Shugaban Ƙasa Bola Ahmed Tinubu ya tabbatar da cewa gwamnatin tarayya za ta ci gaba da ɗaukar matakan da suka dace domin ganin an kuɓutar da ɗalibai da malamai da aka yi garkuwa da su a jihohin Oyo da Borno.
Wannan tabbaci ya fito ne ta bakin Ministan Yaɗa Labarai da Wayar da Kai na Ƙasa, Mohammed Idris, yayin wani taron musamman kan harkokin tsaro da aka gudanar a Abuja ranar Alhamis.
A cewar ministan, shugaban ƙasar ya bayyana sace ɗalibai da malamai a matsayin babban barazana ga ilimi da ci gaban al’umma, tare da jaddada cewa an umarci hukumomin tsaro su yi amfani da dukkan hanyoyin da doka ta amince da su wajen ceto waɗanda abin ya shafa.
Rahotanni sun nuna cewa an yi garkuwa da ɗalibai da malamai a Jihar Oyo, yayin da a Jihar Borno wasu da ake zargin ’yan ta’adda ne suka kai hari makaranta a Ƙaramar Hukumar Askira/Uba, lamarin da ya janyo ɓacewar yara da dama.
Mohammed Idris ya ce hukumomin tsaro daban-daban sun haɗa kai wajen gudanar da aikin ceto, ciki har da rundunar soji, ’yan sanda, DSS, NIA, ONSA da kuma Cibiyar Yaƙi da Ta’addanci ta Ƙasa.
Ya bayyana cewa ana ci gaba da gudanar da bincike, tattara bayanan sirri, sa ido ta sama da kuma haɗin gwiwa da al’umma domin gano inda waɗanda aka sace suke da kuma tabbatar da an dawo da su cikin aminci.
Ministan ya kuma ce gwamnatin Tinubu na aiwatar da sabbin dabarun yaƙi da rashin tsaro ta hanyar amfani da fasahar zamani, bayanan sirri da kuma sake fasalin tsarin tsaro domin samun sakamako mai ɗorewa.
Haka kuma, ya bayyana cewa daga cikin sauye-sauyen da gwamnati ke dubawa akwai batun kafa ’yan sandan jihohi domin ƙarfafa tsaro a matakin ƙananan hukumomi da yankunan karkara.
Idris ya ƙara da cewa Shugaba Tinubu na ci gaba da tuntubar Gwamnan Jihar Oyo, Seyi Makinde, da shugabannin hukumomin tsaro domin bibiyar matakan da ake ɗauka na ceto waɗanda aka sace.
Ya kuma miƙa saƙon ta’aziyya da jajantawa ga iyalan waɗanda lamarin ya shafa, yana mai tabbatar musu da cewa gwamnati ba za ta huta ba har sai an dawo da ’ya’yansu da malamansu gida cikin ƙoshin lafiya.
