Hukumar Yaƙi da Sha da Fataucin Miyagun Ƙwayoyi ta Ƙasa (NDLEA) ta sanar da kama wata mata ‘yar ƙasar Afirka ta Kudu mai shekaru 38 a Filin Jirgin Sama na Ƙasa da Ƙasa na Nnamdi Azikiwe da ke Abuja, bayan gano hodar iblis mai nauyin kilogram 5.75 a cikin kayanta.
A cewar NDLEA, matar ta yi ƙoƙarin kauce wa binciken jami’an tsaro ta hanyar tafiya tare da ɗanta mai shekaru uku, tana fatan hakan zai rage mata tsauraran matakan bincike.
Hukumar ta bayyana a cikin wata sanarwa cewa an kama wadda ake zargin ne a ranar 6 ga Yulin 2026, yayin binciken fasinjojin jirgin Qatar Airways da ya sauka a Abuja daga birnin Doha.
Sanarwar ta ce da farko matar ta musanta mallakar wasu jakunkunan da aka yi rajista da sunanta, amma binciken jami’an NDLEA ya gano cewa lambobin rajistar jakunkunan sun yi daidai da waɗanda ke manne a fasfo ɗinta.
Bayan gudanar da bincike, jami’an sun gano hodar iblis mai nauyin kilogram 5.75 da aka ɓoye a cikin jakunkunan.
NDLEA ta ƙara da cewa wadda ake zargin ta bayyana cewa ta taso ne daga ƙasar Cambodia, ta bi ta Doha kafin ta iso Najeriya.
Binciken farko da hukumar ta gudanar ya nuna cewa ana zargin matar na da alaƙa da wata ƙungiyar fataucin miyagun ƙwayoyi ta ƙasa da ƙasa da ke gudanar da ayyukanta tsakanin ƙasashen Cambodia da Afirka ta Kudu, yayin da ake ci gaba da bincike kan lamarin.
