Yayin da ’yan Najeriya ke ci gaba da fatan ganin sauƙin farashin fetur, rahotanni sun nuna cewa farashin man na iya ci gaba da kasancewa sama da Naira 1,000 kan kowace lita idan har aka samu gasa mai tsanani tsakanin matatar Dangote da masu shigo da man fetur.
Masana’antar mai ta shiga wani sabon yanayi bayan raguwar farashin ɗanyen mai a kasuwannin duniya zuwa kusan dala 70 kan ganga, sakamakon daidaituwar zirga-zirgar jiragen ruwa ta mashigin Hormuz da ke da muhimmanci ga cinikin mai a duniya.
Duk da wannan sauyi, farashin fetur a Najeriya bai sauka sosai ba, lamarin da ya sa masu amfani da man ke tambayar dalilin da ya sa raguwar farashin ɗanyen mai ba ta yi tasiri kai tsaye a kasuwar cikin gida ba.
Tun bayan fara aikin matatar Dangote da kuma raguwar rawar da NNPC ke takawa wajen shigo da fetur, matatar ta zama ɗaya daga cikin manyan masu tasiri wajen ƙayyade farashin man fetur a ƙasar.
A yayin da ake ci gaba da kira ga kamfanonin mai su rage farashi domin sauƙaƙa wa jama’a, wani jami’i a Kamfanin Dangote ya bayyana cewa ya kamata a kuma duba farashin da masu shigo da fetur ke sayarwa, musamman waɗanda ke samun mai daga kasuwannin ƙetare.
Jami’in ya nuna mamakinsa kan yadda wasu dillalan da ke shigo da fetur daga ƙasashen da ke sayar da mai a farashi mai rahusa ba su rage farashin da suke sayarwa a kasuwar Najeriya ba.
Lamarin ya ƙara haifar da muhawara a tsakanin masu ruwa da tsaki a harkar mai, yayin da jama’a ke ci gaba da jiran matakan da za su iya haifar da sauƙin farashin fetur a ƙasar.
Masana na ganin cewa yadda kamfanonin mai da dillalai za su tsara farashinsu a makonni masu zuwa ne zai bayyana ko farashin fetur zai fara sauka ko kuma zai ci gaba da zama a matakan da yake a halin yanzu.
