Shugaban Amurka Donald Trump ya bayyana cewa gwamnatinsa na fifita tattaunawa da Iran maimakon ɗaukar matakin soja, duk da cewa yana ganin Amurka na da ƙarfin da za ta iya murƙushe ƙasar cikin ƙanƙanin lokaci.
A wata hira da ya yi da tashar talabijin, Trump ya ce Amurka ta samu gagarumar nasara a matakan da ta ɗauka kan Iran, inda ya yi ikirarin cewa an lalata wasu muhimman kayayyakin tsaro da na soja na ƙasar.
Ya kuma bayyana cewa takunkuman da Amurka ta ƙaƙaba sun yi tasiri sosai ga tattalin arzikin Iran da harkokin jigilar kayanta ta ruwa.
Sai dai duk da waɗannan kalamai, Trump ya jaddada cewa har yanzu yana ganin tattaunawa da cimma yarjejeniya ita ce hanya mafi dacewa, domin gujewa asarar rayuka da ƙarin tashin hankali a yankin.
A cewarsa, Amurka za ta ci gaba da neman mafita ta lumana, amma ba za ta yi ƙasa a gwiwa ba wajen kare muradunta idan bukatar hakan ta taso.
Trump ya kuma nuna cewa har yanzu akwai yiwuwar ɓangarorin biyu su cimma matsaya ta hanyar tattaunawa, duk da takun-sakar da ake ci gaba da samu tsakanin ƙasashen biyu.
