Fadar Shugaban Ƙasa ta mayar da martani kan kiran da tsohon ɗan takarar shugaban ƙasa na jam’iyyar Labour Party, Peter Obi, ya yi wa Shugaba Bola Ahmed Tinubu da ya sauka daga mulki.
A cikin wata sanarwa da Mai Bai wa Shugaban Ƙasa Shawara kan Harkokin Yaɗa Labarai, Bayo Onanuga, ya fitar, ya bayyana kiran da Obi ya yi a matsayin wani yunƙuri na siyasa da ba shi da tushe, yana mai cewa hakan na neman karkatar da hankali daga ayyukan ci gaba da gwamnatin ke aiwatarwa.
Onanuga ya ce hujjojin da Peter Obi ya gabatar wajen neman shugaban ƙasar ya yi murabus ba su dace da haƙiƙanin yanayin da Najeriya ke ciki ba tun bayan hawan gwamnatin Tinubu mulki a shekarar 2023.
Ya ƙara da cewa gwamnati na ci gaba da ɗaukar matakan farfaɗo da tattalin arziki, inganta tsaro da kuma aiwatar da sauye-sauyen da ake ganin za su amfani al’umma a nan gaba.
Fadar Shugaban Ƙasar ta kuma yi nuni da sakamakon wasu zaɓukan da aka gudanar a baya-bayan nan, inda ta ce nasarorin da jam’iyyar APC ta samu a wasu yankuna alama ce da ke nuna cewa jama’a na ci gaba da nuna amincewa da manufofi da jagorancin Shugaba Bola Ahmed Tinubu.
Sanarwar ta jaddada cewa gwamnatin tarayya ba za ta kauce daga aiwatar da shirye-shiryenta na ci gaban ƙasa ba, duk da sukar da take fuskanta daga wasu ’yan adawa.
