Masu zanga-zangar sun toshe babbar hanyar Sokoto–Yauri–Birnin Kebbi a ranar Juma’a, inda suka nemi gwamnatin jihar da hukumomin tsaro su ɗauki matakan gaggawa domin kawo ƙarshen matsalar tsaron da ke addabar yankin.
Rahotanni sun nuna cewa matasan sun kunna wuta a kan hanya tare da shimfiɗa itatuwa domin hana zirga-zirgar ababen hawa, lamarin da ya haddasa tsaiko na sa’o’i kafin jami’an tsaro su tarwatsa taron.
A lokacin da wasu jami’an gwamnati suka isa yankin domin jajanta wa waɗanda abin ya shafa, an ruwaito cewa masu zanga-zangar sun nuna fushinsu ga Shugaban Majalisar Dokokin Jihar Sakkwato, Tukur Bala Bodinga, inda suka yi masa ihu tare da jefa duwatsu, kodayake babu rahoton lalacewar motoci ko jikkatawa.
Wakilan da suka ziyarci yankin sun tarar da ɗaruruwan mutanen da suka tsere daga ƙauyukansu suna neman mafaka a makarantu, masallatai da gidajen jama’a bayan hare-haren da suka afku a yankuna da dama na ƙaramar hukumar.
Mata, yara da tsofaffi daga ƙauyukan da lamarin ya shafa sun mamaye wuraren da aka tanada domin karɓar ’yan gudun hijira, yayin da wasu iyalai ke ci gaba da fuskantar mawuyacin hali sakamakon rasa matsugunansu.
Wani daga cikin waɗanda suka tsere daga ƙauyen Qyaula ya bayyana cewa maharan sun kai farmaki ne da yammacin Alhamis, inda suka rika harbe-harbe tare da kashe mutane kafin jama’a su watse domin tsira da rayukansu.
Bayanan da aka samu sun nuna cewa hare-haren sun shafi ƙauyuka da dama da suka haɗa da Qyaula, Keloji, Chohi Takule, Kulodo, Kwamtsi, Danchadi, Lugge, Dabagi da Karaje.
Daga bisani, wasu manyan jami’an gwamnati da suka haɗa da Shugaban Majalisar Dokokin Jihar, ɗan Majalisar Wakilai mai wakiltar yankin, Sakataren Gwamnatin Jihar, shugaban ƙaramar hukuma da jami’an tsaro sun kai ziyara domin jajanta wa al’ummar yankin tare da halartar jana’izar waɗanda suka rasa rayukansu.
Rundunar ’Yan Sandan Jihar Sakkwato ta bayyana cewa jami’anta sun shafe sa’o’i suna gudanar da ayyukan tsaro a yankin tun daga ranar Alhamis, kuma an tura ƙarin jami’ai domin ƙarfafa tsaro da hana sake aukuwar irin wannan hari.
Sabon harin ya biyo bayan kashe Babban Limamin Talluje da wasu mutum biyu a yankin Bodinga, lamarin da ya ƙara tayar da hankalin al’umma kan tabarbarewar tsaro a wasu sassan jihar.
