Ministan Harkokin Cikin Gida, Dakta Olubunmi Tunji-Ojo, ya bayyana cewa tsarin tattara da tantance bayanan ’yan ƙasa na Hukumar Kula da Shaidar Ɗan Ƙasa (NIMC) ya taka muhimmiyar rawa wajen gano wasu mutane bakwai da ake zargin manyan kwamandojin Boko Haram da ISWAP ne bayan dawowarsu daga aikin Hajjin 2026.
Ministan ya bayyana hakan ne a Abuja bayan Shugaba Bola Ahmed Tinubu ya rattaba hannu kan sabuwar dokar NIMC ta shekarar 2026, kamar yadda rahotanni suka bayyana.
A cewarsa, an kama mutanen da ake zargin a Filin Jirgin Sama na Katsina a ranar Alhamis yayin da suke dawowa daga ƙasar Saudiyya, kafin daga bisani a miƙa su ga Hukumar Tsaro ta DSS domin zurfafa bincike.
Tunji-Ojo ya ce nasarar gano su ta samu ne sakamakon haɗa bayanan NIMC da na Hukumar Shige da Fice ta Najeriya, tare da amfani da bayanan tsaro na ƙasa da ƙasa da ke da alaƙa da Interpol.
Ya bayyana cewa sabon tsarin zai taimaka wajen ƙarfafa tsaron ƙasa, gano masu hannu a ayyukan ta’addanci, daƙile satar bayanai da kuma sauran laifukan da suka shafi tsaro.
Ministan ya kuma yi nuni da cewa a baya bayanan ’yan ƙasa a Najeriya suna hannun hukumomi daban-daban ba tare da cikakkiyar alaƙa tsakaninsu ba, amma yanzu an samar da tsarin da zai haɗa su domin sauƙaƙa tantance bayanai da gano masu aikata laifuka.
Ya ƙara da cewa a ƙarƙashin sabon tsarin, samun fasfon Najeriya ba zai yiwu ba sai an tantance bayanan mutum ta hanyar tsarin NIMC.
Shugaba Tinubu ya sanya hannu kan dokar ne a gaban Shugaban Majalisar Dattawa, Godswill Akpabio, da wasu manyan jami’an gwamnati, inda ake sa ran dokar za ta ƙara inganta tsarin bayanan ’yan ƙasa da kuma tsaron Najeriya baki ɗaya.
