Gwamnatin Tarayya ta ƙaddamar da wani sabon tsari da nufin sake haɗa tubabbun ‘yan ta’adda da suka ajiye makamansu cikin al’umma bayan sun nuna tubarsu.
A cewar gwamnati, shirin zai haɗa gwiwar ma’aikatun gwamnati, hukumomin tsaro, gwamnatocin jihohi da sauran masu ruwa da tsaki domin tabbatar da aiwatar da tsarin cikin tsari, tare da rage yiwuwar waɗanda suka tuba su koma aikata ta’addanci.
An bayyana cewa sabon tsarin zai mayar da hankali wajen ba waɗanda suka mika wuya horon sana’o’i, tallafin dogaro da kai da kuma ci gaba da sa ido a kansu bayan sun koma cikin al’umma.
Gwamnatin ta ce matakin na daga cikin ƙoƙarinta na ƙarfafa zaman lafiya, sake farfaɗo da yankunan da rikice-rikice suka daɗe suna addaba, da kuma ba tsofaffin mayaƙan damar fara sabuwar rayuwa cikin lumana.
Sai dai wasu masana harkokin tsaro sun bayyana cewa nasarar shirin za ta ta’allaka ne kan ingantaccen tsarin sa ido, haɗin kan al’umma da kuma tabbatar da adalci ga waɗanda rikicin ya shafa, domin samar da zaman lafiya mai ɗorewa a Najeriya.
